Starfsfólk Orkídeu hitti sveitarstjórnarfólk í Mýrdalshreppi á dögunum. Á fundinum voru Einar Freyr Elínarson (sveitarstjóri Mýrdalshrepps, geitaræktandi og í ferðaþjónustu), Drífa Bjarnadóttir (fiskeldisbóndi og fulltrúi í Skipulags- og Umhverfisráði) og Magnús Örn Sigurjónsson (korn- og kúabóndi á Eystri-Pétursey, í Skipulags- og Umhverfisráði)

Við kynntum áherslur og markmið Orkídeu ásamt helstu áskorunum nýsköpunarumhverfisins á Suðurlandi, sögðum m.a. frá hringrásargörðum og ESB verkefnum sem Orkídea tekur þátt í sem eru með áherslu á lífgas og áburðarframleiðslu þ.e. Terraforming LIFE og Value4Farm. Við nefndum einnig segulhitaraverkefnið – sem nýtir vatn eða vind til að breyta hreyfiorku beint í varmaorku en Vík og nágrenni eru snauð af vinnanlegum jarðhita til húshitunar.

Drífa ræktar bleikju og selur hausaðan og slægðan fisk til Klausturbleikju til frekari vinnslu.

Mýrdalshreppur hefur gengið í gegnum stórfelldar breytingar á síðustu árum. Landbúnaður hefur verið á undanhaldi, en ferðaþjónusta komin í staðinn og talsvert er til af ónýttu ræktarlandi þar sem búum hefur fækkað í sveitarfélaginu. Vík hefur stækkað mjög hratt, en fjölgunin byggist á fólki af erlendan ríkisborgararétt. Núna er samsetning íbúa sveitarfélagsins þannig að 70% erlendir ríkisborgarar og 30% íslenskir. Dregið hefur úr veltu á erlendu starfsfólki, meira af fólki með heilsársstörf og fyrirtækin vilja frekar ráða fólk í heilsársstörf.

Við áttum spjall um lífgas- og áburðarvinnslu, m.a. ræddum við hvort lúpína gæti verið hráefni í lífgas en rannsaka þyrfti betur hvort hún hentar sem hráefni. Lúpína er algeng á sunnlenskum söndum, eins og kunnugt er. Talsvert magn af lífrænum heimilisúrgangi er frá hótelum og gistiheimilum á Vík sem gæti einnig nýst í lífgas- áburðarvinnslu.

Vík er eingöngu með rafkyndingu bæði fyrir hótel og heimili, og er rafmagnskostnaður íbúa og fyrirtækja í sveitarfélagi mjög hár. Afhemdingaröryggi rafmagns er lítið og fer versnandi, að mati heimamanna.

Jarðefnaflutningur frá Hafursey á færiböndum til sjávar er skv. sveitarstjórnarfólkinu ekki inni í myndinni að svo stöddu þar sem hugmyndin felur í sér of mikið rask og lítinn sem engan sjáanlegan ávinning fyrir sveitarfélagið.

Takk fyrir gott spjall og góðar mótttökur, Einar Freyr, Drífa og Magnús Örn!