Katie Hoare, kúabóndi frá Cornwall á Englandi, flutti áhugavert erindi á nýafstöðnu vefþingi Orkídeu og Eims um orkuskipti í landbúnaði. Þar lýsti hún því hvernig fjölskyldubú þeirra, Trenance Dairy, tók stakkaskiptum með innleiðingu á Bennamann-kerfinu, sem gerir bændum kleift að breyta kúamykju í orku. Að sögn Katie var búið keyrt alfarið áfram á eigin metanframleiðslu í hálft annað ár, sem gjörbylti ekki aðeins rekstrinum heldur einnig viðhorfi þeirra til úrgangs.

„Það hljómar kannski ótrúlega, en í hálft annað ár var búið okkar alfarið keyrt áfram á metani sem við framleiddum úr okkar eigin kúamykju,“

Katie og maðurinn hennar hófu búskap árið 2018 með um 50 kýr en eru nú með 100 kúa bú á 50 hekturum. Fljótlega áttuðu þau sig á því að stjórnun búfjáráburðar væri ein stærsta áskorunin í rekstrinum. Með þátttöku í tilraunaverkefni með Bennamann-kerfinu létu þau útbúa sérstakt lokað „mykju“ lón sem fangar metangasið sem myndast náttúrulega í mykjunni.

Frá efasemdum yfir í fullkomna hringrás

Eiginmaður Katie var í upphafi mjög efins um að hægt væri að keyra dráttarvél eingöngu á „kúaskít“ og vildi helst halda sig við hefðbundnar dísilvélar. Reynslan varð hins vegar önnur þegar þau tóku í notkun metanknúna New Holland T6.180 dráttarvél. Í 18 mánuði þurftu þau nánast enga dísilolíu fyrir búið. Metanið af eigin lóni annaði allri daglegri vinnu, svo sem fóðrun og flutningi á heyi.

„Þetta var ótrúlegt hringrásarkerfi,“ sagði Katie. „Allt sem kom úr kúnum fór í lónið, metangasið fór á dráttarvélina og það sem eftir var í lóninu notað sem hágæða áburður á túnin sem síðan fóðrar kýrnar. Eina afurðin sem fór út af búinu var mjólkin.“

Gríðarlegur sparnaður og minna kolefnisfótspor

Ávinningurinn var ekki aðeins bundinn við eldsneytið. Með því að hafa lónið lokað með sérstakri yfirbreiðslu komust þau hjá því að rigningarvatn þynnti áburðinn. Það sparaði þeim 119 ferðir með áburðardreifara á einum vetri. Jafnframt reyndist áburðurinn úr lóninu svo næringarríkur að þau gátu minnkað kaup á tilbúnum áburði um 55%.

Áhrifin á umhverfið voru sömuleiðis sláandi. Kolefnisfótspor 90% eftir að kerfið var komið í fulla virkni.

Regluverkið þarf að fylgja tækninni

Þrátt fyrir frábæran árangur þurftu þau að hætta í verkefninu þegar tilraunatímanum lauk vegna skorts á opinberum stuðningi og leyfismálum í Bretlandi. Katie vinnur nú að því að þrýsta á stjórnvöld um að breyta reglugerðum svo fleiri bændur geti nýtt þessa tækni án þess að þurfa flóknar lífgasstöðvar.

„Kýrin er skilvirkasta endurvinnsluvél sem til er ef við nýtum hana rétt. Orkuskiptin gerðu okkur kleift að einbeita okkur að því sem skiptir máli: jarðveginum, kúnni og jafnvægi milli vinnu og einkalífs, þar sem við vorum ekki lengur stöðugt að elta aðföng eins og dísilolíu og áburð,“ sagði Katie að lokum.

Fréttin er unnin úr erindi Katie Hoare á vefþinginu „Orkuskipti í landbúnaði“, sem haldið var í samstarfi Orkídeu, Eims og Evrópuverkefnanna Value4Farm og RECET.