Orkídea, Baseload Power og Hitaveita Flúða stóðu fyrir vel heppnuðum fundi með lykilhagaðilum í Hrunamannahreppi þann 12. mars s.l., þar sem fjallað var um tækifæri til aukinnar hagkvæmni, bættrar jarðhitanýtingar og uppbyggingar atvinnutækifæra við Kópsvatnsvirkjun.

Fundurinn var hluti af verkefninu „Smávirkjanir: Hagkvæmni og nýsköpunartækifæri“, sem hlaut styrk úr Uppbyggingarsjóði Suðurlands haustið 2024. Mikilvægur þáttur í verkefnavinnunni felst í samtali og samsköpun hugmynda með heimamönnum, og var fundurinn mikilvægt skref í þeirri vegferð.

Hjörleifur Þór Steingrímsson kynnti starfsemi Baseload Power á Íslandi og fjallaði um áskoranirnar sem fylgja rekstri smávirkjana eins og Kópsvatnsvirkjunar á lághitasvæðum Suðurlands. Hann lagði áherslu á að auka þurfi hagkvæmni slíkra virkjana með bættri auðlindanýtingu, sem geti leitt til frekari atvinnutækifæra á svæðinu.

Að kynningunni lokinni var fundarmönnum boðið að taka þátt í hugarflugi um aukna nýtingu jarðhitans og uppbyggingu atvinnutækifæra við Kópsvatnsvirkjun. Margar spennandi hugmyndir komu fram, og sköpuðust fjörugar umræður í kjölfarið.

Orkídea vinnur nú að því að taka saman helstu niðurstöður fundarins. Það er bæði nauðsynlegt og mikilvægt að fá umræðu og ábendingar heimamanna um atvinnuskapandi hugmyndir í heimabyggð.

Kærar þakkir fyrir góðan og árangursríkan fund!