Fulltrúar tæknifyrirtækisins 4D-Bios heimsóttu Orkídeu á dögunum til að kanna hvernig lóðrétt ræktun getur eflt íslenska garðyrkju. Með því að nýta ræktun í hæðina og íslenska græna orku má stórauka uppskeru og fæðuöryggi á sjálfbæran hátt.

Á dögunum fengum við góða gesti til landsins, þá Desmond Pan og David Lin frá kínverska tæknifyrirtækinu 4D-Bios. Fyrirtækið er leiðandi á heimsvísu þegar kemur að lausnum fyrir lóðrétta ræktun (e. vertical farming), en þeir hafa þegar sett upp ræktunarstöðvar í Kína og Evrópu sem þekja um 14 hektara.

Hvað er lóðrétt ræktun?

Í stað þess að rækta plöntur á hefðbundinn hátt í löngum röðum á jörðinni er lóðrétt ræktun eins og „fjölbýlishús fyrir grænmeti“. Plöntunum er staflað í hæðir í stýrðu umhverfi þar sem hver dropi af vatni og hver geisli af ljósi er nýttur til hins ýtrasta.

„Þetta snýst um að fá sem mest út úr hverjum fermetra,“ segir Sveinn Aðalsteinsson, framkvæmdastjóri Orkídeu. „Með tækni 4D-Bios getum við séð fyrir okkur fleiri uppskerur á ári af salati, auk þess sem hægt er að rækta við kjöraðstæður allt árið um kring. Sem dæmi má nefna að koltvísýringsgjöf nýtist mun betur í svona lokuðu kerfi.“

Snjalllausnir og hringrás í Reykholti og Helguvík

Hópurinn heimsótti meðal annars iFarm í Græna iðngarðinum í Helguvík og Jarðarberjaland/Friðheima í Reykholti. Þar fengu gestirnir innsýn í hvernig íslenskir garðyrkjubændur nýta jarðhitann og hversu framarlega við stöndum nú þegar.

Sérstaða 4D-Bios felst meðal annars í hagstæðum ræktunargámum sem koma tilbúnir til notkunar. Þeim má einfaldlega „stinga í samband“ við vatn, rafmagn og koltvísýring (CO2). Þetta styður beint við hugmyndafræði hringrásarhagkerfisins sem Orkídea leggur áherslu á – þar sem við nýtum hliðarstrauma frá iðnaði, eins og varma og koltvísýring, til að búa til fersk matvæli.

Það var virkilega hvetjandi að ræða við hagsmunaaðila í garðyrkjunni á svæðinu og sjá hversu mikill áhugi er á að þróa þessa tækni áfram. Orkídea, sem er samstarfsverkefni Landsvirkjunar, Samtaka sunnlenskra sveitarfélaga (SASS), Landbúnaðarháskóla Íslands og stjórnvalda, mun halda áfram að vera brú á milli alþjóðlegrar tækniþekkingar og íslensks atvinnulífs.

Við þökkum Desmond og David kærlega fyrir komuna og hlökkum til að fylgjast með næstu skrefum í þessari spennandi þróun!

Viltu vita meira um nýsköpun í matvælaframleiðslu? Kynntu þér verkefni okkar á orkidea.is.