Hátíðarstemning ríkti í vikunni þegar Vísinda- og rannsóknarsjóður Suðurlands úthlutaði styrkjum til meistaranema við Háskóla Íslands annars vegar og doktorsnema við Landbúnaðarháskóla Íslands hins vegar. Markmið Vísinda- og rannsóknarsjóðsins er að styrkja stúdenta sem eru að vinna að lokaprófsverkefni til rannsóknarstarfa á Suðurlandi. Halla Tómasdóttir forseti Íslands heiðraði samkomuna með nærveru sinni og minnti gesti á að hugvit og samvinna eru okkar dýrmætasta auðlind.

Við sama tilefni voru Menntaverðlaun Suðurlands afhent, en dagurinn var sannkölluð uppskeruhátíð fyrir þekkingu og framfarir í landsfjórðungnum. Verkefnin sem hlutu styrk í ár endurspegla vel áherslur okkar hjá Orkídeu – að nýta vísindi til að skilja umhverfið okkar betur og skapa verðmæti til framtíðar.

„Verðmætasta auðlindin“

Í opnunarávarpi lagði Ingveldur Sæmundsdóttir, framkvæmdastjóri Háskólafélags Suðurlands, áherslu á mikilvægi sköpunarkraftsins.

„Sköpunarkraftur, hugvit og samvinna er dýrmætasta auðlindin,“ sagði Ingveldur og benti á að stærsta samkeppnisforskot Suðurlands til framtíðar væri hæft fólk.

Hún undirstrikaði einnig hlutverk Háskólafélagsins við að tengja saman háskóla og atvinnulíf og nefndi sérstaklega mikilvægi þess að nýsköpun nái inn í starfandi fyrirtæki, ekki síður en sprotafyrirtæki.

Rannsóknir sem skipta máli fyrir nærsamfélagið

Í ár bárust 16 umsóknir í sjóðinn, sem er til marks um þá miklu grósku sem er í rannsóknarstarfi tengdu Suðurlandi. Stjórn sjóðsins, sem Sveinn Aðalsteinsson framkvæmdastjóri Orkídeu situr í ásamt Sigurði Sigursveinssyni, fyrrum framkvæmdastjóri Háskólafélags Suðurlands, og Lilju Jóhannesdóttur, fyrrum forstöðumanns Náttúrustofu Suðausturlands, ákvað að skipta 2 milljóna króna styrknum jafnt á milli tveggja verkefna.

Bæði verkefnin eiga það sameiginlegt að auka skilning okkar á náttúru Suðurlands, hvort sem horft er til fortíðar eldstöðva eða framtíðar í loftslagsmálum.

Piia Tomingas (Landbúnaðarháskóli Íslands)

Verkefni Piiu snýst um að skilja hvernig endurheimt votlendis og rykákomur (fok úr jarðvegi) hafa áhrif á lífríki í votlendi á Suðurlandi. Verkefnið hefur mikla þýðingu við aðgerðir til að endurheimta votlendi sem vísindamenn eru sammála um að sé þýðingarmesta aðgerðin við að draga úr losun koltvísýrings í landbúnaði og þar með draga úr kaupum á losunarheimildum sem stjórnvöld standa frammi fyrir á næstu árum. Verkefnið hefur því bæði fræðilega og hagnýta skírskotun.

Þorbjörg Anna Gísladóttir (Háskóli Íslands)

Hlaut styrk fyrir rannsóknir á gossögu og uppruna bergs Heklu og Vatnafjalla. Þorbjörg rýnir langt aftur í tímann, eða meira en 11.000 ár, til að kortleggja gossögu svæðisins. Með því að efnagreina gamalt berg er hægt að lesa í hegðun Heklu. Þessi þekking er mikilvæg fyrir öryggi íbúa og ferðafólks á Suðurlandi, því fortíðin gefur okkur vísbendingar um hvað framtíðin ber í skauti sér.

Verkefnið stendur traustum fótum í bæði fræðilegum og hagnýtum skilningi. Allt sem eykur þekkingu almennings og viðbragðsaðila á Suðurlandi á kenjum Heklu er af hinu góða og afar nauðsynlegt. Ekki aðeins vegna öryggissjónarmiða, heldur er það líka fræðileg skylda að skilja betur þetta tignarlega fjall og þá ofurkrafta sem þar búa undir.

Samvinna skilar árangri

Orkídea óskar styrkþegum og verðlaunahöfum innilega til hamingju. Vísinda- og rannsóknarsjóður Suðurlands er sönnun þess hvað hægt er að gera þegar sveitarfélög, fyrirtæki og stofnanir taka höndum saman.

Með því að styðja við bakið á vísindafólki erum við að fjárfesta í sjálfbærri framtíð fyrir okkur öll.