18. október 2021

Mikið frumkvöðlastarf í Eyjum

F.v. Sveinn, Íris bæjarstjóri og Helga

Við heimsóttum Vestmannaeyjar í síðustu viku og áttum gott spjall við Írisi Róbertsdóttur bæjarstjóra. 

Íris fór m.a. yfir sögu verkefnisins „Vestmannaeyjar – sjávarlíftæknivettvangur Íslands“ og mikilvægi þess að sveitarfélög komi að frumkvöðlastarfssemi á upphafsstigum. Til þess þarf að skapa aðstæður s.s. húsnæði og aðstoða við að ræsa svona verkefni. Í því skyni réði sveitarfélagið Dr. Hólmfríði Sveinsdóttur frumkvöðul og verkefnastjóra til að leiða verkefnið og sömuleiðis var sótt um styrk í Lóuna. Verkefnið var kynnt fyrir skömmu, en undirbúningur þess hefur staðið í eitt og hálft ár. Megin tilgangur verkefnisins er að efla enn frekar frumkvöðlastarfsemi, atvinnutækifæri og verðmætasköpun í Vestmannaeyjum. Það er unnið í samvinnu við stofnanir og sjávarútvegsfyrirtæki í Eyjum, háskóla í landinu og vísindamenn sem þar starfa.  

Eins og víðar á Suðurlandi er skortur á flutningsgetu á rafmagni og nýr Vestmannaeyjastrengur er ekki kominn inn í framkvæmdaáætlun 2021-2023. Eins vantar varafl þrátt fyrir skyldur orkusala þar að lútandi sem stefnir afhendingaröryggi rafmagns í hættu. Fyrirsjáanleg er mikil og vaxandi raforkuþörf t.d. í tengslum við orkuskipti og landeldi. 

Neðansjávarvatnsleiðsla flytur vatn frá fastalandinu (Syðstu Mörk undir Eyjaföllum) til Vestmanneyja. Þessi vatnsleiðsla gegnir mikilvægu hlutverki við alla  fisk- og matvælavinnslu í Vestmannaeyjum. Nú er eingöngu ein neðansjávarleiðsla og þyrfti aðra til að hafa varaskeifu ef eitthvað kemur uppá, þar sem vatnskortur getur haft mikil og hamlandi áhrif á alla atvinnustarfsemi í Eyjum. 

HS veitur er með fjórar sjóvarmadælur. Á hverjum klukkutíma er 450 l/sek. dælt upp af 8°C heitum sjó til orkuframleiðslunnar. Vinnslumiðill sjóvarmadælunnar er ammoníak sem fer í gegn um sjóvarmaskiptin. Þegar kerfið er fullprófað og frágengið er 1 MW sett inní kerfið en varmaskiptin skila 3 MW. 

Takk fyrir góðar mótttökur, Íris!

Fleiri fréttir

Allar fréttir
20. maí 2025
Ráðstefna Orkídeu og Eims um lífgas 5. júní
Lesa meira
19. maí 2025
Einar Mäntylä ráðinn til Orkídeu
Lesa meira
9. maí 2025
Gangur í ESB verkefninu okkar Value4Farm
Lesa meira
20. mars 2025
Grein starfsfólks Orkídeu um hringrásargarða birt í Bændablaðinu
Lesa meira