Á vefþinginu um „orkuskipti í landbúnaði“ sem Orkídea og Eimur stóðu að á dögunum, vakti erindi Andrew Parsons, fulltrúa breska tæknifyrirtækisins Bennamann, mikla athygli. Undir yfirskriftinni „Hættu að kaupa eldsneyti og byrjaðu að framleiða það“ kynnti hann hvernig bændur geta breytt búfjáráburði og öðrum lífrænum úrgangi í hágæða lífmetan til að knýja dráttarvélar og flutningatæki.

Bennamann er framsækið nýsköpunarfyrirtæki sem er að meirihluta í eigu vélaframleiðandans Case New Holland (CNH). Markmið þess er að gera orkuskipti í landbúnaði að raunveruleika með því að bjóða bændum upp á tækni til að fanga metan sem annars myndi sleppa út í andrúmsloftið frá hauggasi eða öðrum úrgangi. Með því að fanga þetta gas, lífgas, sem er samsett úr metani og koldíoxíði, og hreinsa það með sérstökum himnum, verður til hágæða eldsneyti sem er fyllilega sambærilegt við jarðefnaeldsneyti hvað orkuinnihald varðar.

Snjöll lausn sem styrkir sjálfstæði bænda

Tæknin er hönnuð með þarfir landbúnaðarins í huga. Búnaðurinn er færanlegur og auðveldur í notkun, þar sem eldsneytið er geymt á hylkjum undir þrýstingi og áfylling á vélar fer fram með svipuðum hætti og fólk þekkir við hefðbundnar dælustöðvar. Andrew benti á að kerfi þeirra geti framleitt allt að 140.000 rúmmetra af lífmetani á ári, sem jafngildir um 140.000 lítrum af dísilolíu. Þetta sparar gríðarlega fjármuni ásamt því að minnka kolefnisfótspor búrekstrurins um allt að 80%.

Raunveruleg dæmi um árangur

Í erindi sínu deildi Andrew sögum af bændum í Bretlandi sem þegar hafa innleitt tækni Bennamann. Einn bóndi nefndi að þegar ófriður hófst í Miðausturlöndum og heimsmarkaðsverð á olíu rauk upp hafi hann verið algjörlega óháður þeim sveiflum þar sem hann framleiddi sitt eigið eldsneyti sjálfur.

Önnur dæmi sýna hvernig stórmarkaðir og mjólkursamlög, eins og Arla, þrýsta nú í auknum mæli á bændur að sýna fram á sjálfbærni. Með því að skipta yfir í lífmetan geta bændur mætt þessum kröfum og jafnframt skapað ný verðmæti úr aukaafurðum sem áður voru einungis taldar úrgangur.

Er Ísland næst á dagskrá?

Andrew sýndi íslenskum aðstæðum mikinn áhuga og benti á að orkusjálfstæði bænda væri lykilatriði um allan heim. Hann sagði fyrirtækið leita að samstarfsaðilum til að stækka á heimsvísu og velti því upp hvort Ísland gæti verið næsti áfangastaður þess, enda séu tækifærin til orkuframleiðslu í sveitum landsins mörg.

Fréttin er unnin úr erindi Andrew Parsons á vefþinginu „Orkuskipti í landbúnaði“, sem haldið var í samstarfi Orkídeu, Eims og Evrópuverkefnanna Value4Farm og RECET.

Erindið í heild sinni má sjá hér