16. nóvember 2026

Sunnlensk kvenhetja í landbúnaði: Halla Sif verðlaunuð af Sameinuðu þjóðunum

Orkídea heimsótti nýverið Höllu Sif Svansdóttur Hölludóttur, garðyrkjubónda og eiganda Sólskins grænmetis á Flúðum. Halla var á haustmánuðum valin í hóp fyrstu 100 kvenhetja heims í landbúnaði og byggðaþróun af Matvæla- og landbúnaðarstofnun Sameinuðu þjóðanna (FAO). Hér er um að ræða gríðarlega flotta viðurkenningu, jafnt fyrir Höllu persónulega sem og fyrir sunnlenskan landbúnað og nýsköpun.

Stórhuga uppbygging á Suðurlandi

Halla hóf sinn feril af krafti. Á meðan hún var enn í námi við Garðyrkjuskólann á Reykjum festi hún kaup á garðyrkjustöðinni Gróðri á Hverabakka við Flúðir, sem fól í sér um 4000 fm gróðurhús. Fljótlega stækkaði hún við sig með kaupum á garðyrkjustöðinni Melum (um 5000 fm) og sameinaði reksturinn undir merkjum Sólskins sem grænmeti.

Á stöðvunum tveimur er framleitt fjölbreytt úrval af gæðagrænmeti, tómatar, gúrkur og jarðarber í gróðurhúsum, auk útiræktaðs grænmetis á borð við blómkál, spergilkál og sellerí.

Nýsköpun og ábyrgð á allri virðiskeðjunni

Halla hefur sýnt mikið frumkvæði og farið óhefðbundnar leiðir í sínum rekstri. Árið 2024 hóf hún sjálf innflutning á koltvísýringi, sem er lífsnauðsynlegur fyrir góðan vöxt í ylrækt. Hún er nú í samvinnu við fyrirtækið Veldix varðandi þann innflutning.

Þá ákvað Halla að standa utan Sölufélags garðyrkjumanna, sem er mikil áskorun en jafnframt stórt tækifæri. Þessari ákvörðun fylgdi mikill stofnkostnaður; fjárfesta þurfti í flutningabíl, tækjabúnaði og fjölnota kössum, auk umfangsmikillar vinnu við þróun, hönnun og markaðssetningu á nýju vörumerki. Þrátt fyrir þungan róður í upphafi var skrefið stigið með framtíðina í huga. Eins og Halla bendir á er dýrmætt að geta borið fulla ábyrgð á sinni eigin vöru frá upphafi til enda og haft þannig yfirsýn yfir alla virðiskeðjuna.

Við hjá Orkídeu hvetjum til áframhaldandi nýsköpunar í matvælaframleiðslu og óskum Höllu og hennar samstarfsfólki innilega til hamingju með þessa glæsilegu viðurkenningu FAO!

Fleiri fréttir

Allar fréttir
16. nóvember 2026
Sunnlensk kvenhetja í landbúnaði: Halla Sif verðlaunuð af Sameinuðu þjóðunum
Lesa meira
10. nóvember 2026
150 milljónir í styrki til orkusparandi aðgerða í gróðurhúsum
Lesa meira
10. nóvember 2026
Fundir fyrir kúabændur í Rangárþingi um lífgas- og áburðarframleiðslu
Lesa meira
4. nóvember 2026
Ný rannsókn Value4Farm sýnir fram á tækifæri fyrir sunnlenskan landbúnað
Lesa meira