3. febrúar 2023

Umhverfis-, orku- og loftslagsráðuneytið verður aðili að Orkídeu

Í vikunni var gengið frá aðkomu umhverfis-, orku- og loftslagsráðuneytisins að Orkídeu samstarfsverkefni. Ráðuneytið kemur inn sem meðeigandi verkefnisins ásamt Samtökum sunnlenskra sveitarfélaga (SASS), Landsvirkjun og Landbúnaðarháskóla Íslands. Aðkoma ráðuneytisins gerir Orkídeu kleift að leggja aukna áherslu á t.d. málefni grænna iðngarða á Suðurlandi en þar eru tvö verkefni á dagskrá, annað í Bláskógabyggð (Reykholt og nágrenni) og hitt í Rangárþingi ytra. Hægt verður að sinna fjölmörgum fleiri verkefnum sem ríma öll við stefnuskrá Orkídeu og ráðuneytisins.

Í Stjórnarsáttmála ríkisstjórnarinnar er kveðið á um að Ísland verði vagga nýrra lausna á grunni auðlinda, þekkingar og staðsetningar. Styðja eigi við græna atvinnuuppbyggingu og fjárfestingar ásamt því að greiða götu verkefna, m.a. á sviði föngunar, geymslu og förgunar kolefnis, uppbyggingu hringrásarhagkerfis með fjölnýtingu orkustrauma og orkuskipta.

Guðlaugur Þór Þórðarson, ráðherra umhverfis-, orku og loftslags sagði m.a. við þetta tækifæri: „Markmið stjórnvalda um samdrátt í losun gróðurhúsalofttegunda og markmið um kolefnishlutleysi og full orkuskipti kalla á skýrari sýn og nýja nálgun sem mun byggja á markmiðum fyrir einstaka geira atvinnulífsins, aukna áherslu á loftslagshagstjórn og forgangsröðun í þágu loftslagsmarkmiða á öllum sviðum samfélagsins. Með  þátttöku í Orkídeu getum við komið að nýjum verkefnum sem ætlað er að draga úr losun sem og stuðla að kolefnishlutleysi.“

Bæði stjórnarformaður og framkvæmdastjóri Orkídeu fögnuðu aðkomu ráðuneytisins sem gerði það mögulegt fyrir Orkídeu að setja aukinn kraft í sín verkefni á sviði orkuskipta, sjálfbærni og hringrásarhagkerfisins.

Frá handsali samningsins, f.v. Sveinn Aðalsteinsson (framkv.stj. Orkídeu), Guðlaugur Þór Þórðarson, ráðherra og Bjarni Guðmundsson (stjórnarformaður Orkídeu).

Fleiri fréttir

Allar fréttir
28. febrúar 2024
Vefsíða Value4Farm komin í loftið
Lesa meira
15. febrúar 2024
Hliðarafurðir garðyrkju fela í sér verðmæti
Lesa meira
9. febrúar 2024
Grein Orkídeu í Morgunblaðinu um áburðar- og lífgasver
Lesa meira
8. febrúar 2024
Bændablaðið segir frá skýrslu Orkídeu um lífgas og áburð
Lesa meira